Por iso pensamos que a mellor alternativa ao antigo caderniño de programación da revista R é, por unha banda, a miniguía da túa televisión R a través do mando e, pola outra, a nosa web. Ambas as dúas opcións levaranche á información máis actualizada das pelis, series e demais programas da grella de R e do seu servizo de vídeo baixo demanda (rebobina e catálogo).

mando R: miniguía (OK) e portal vídeo baixo demanda (VOD ou GUÍA)

1.- TECLA OK: acendes o teu desco, pulsas OK e coa miniguía podes consultar toda a programación de R. É moi sinxelo porque agora tes tres caixas diferenciadas:

• miniguía rebobina (esquerda): se premes OK nesta caixa verás que programas de rebobina están dispoñibles. Mediante a frecha arriba/abaixo podes moverte polas canles das que se están a gravar contidos e con dereita/esquerda polos eventos seleccionados. Pulsando OK sobre un evento accedes á súa información e podes reproducilo e usalo coma se dun dvd se tratase (paralo, adiantalo, rebobinalo…).
• miniguía agora (centro): permíteche navegar polos eventos que se están emitindo e que se van emitir nas próximas 24 horas en todas as canles da grella de R. Pulsando OK sobre un evento podes establecer un aviso, acceder á información estendida, sintonizar a canle, etc.
• miniguía catálogo (dereita): accedes a un catálogo de películas “destacadas” do servizo de vídeo baixo demanda de R. Premendo arriba/abaixo verás diferentes categorías (arestora cine e música) e con dereita/esquerda moveraste pola listaxe de películas do catálogo. Unha vez seleccionada a peli podes consultar a información estendida, ver un tráiler (se está dispoñible) ou mercar e reproducir o filme ou o contido musical no seu caso.

2.-TECLA VOD: tamén podes acceder aos contidos do servizo de vídeo baixo demanda de R a través da tecla VOD (ou GUÍA) do mando R; entrarás nun portal onde tes todos os contidos dispoñibles tanto de rebobina como do catálogo R. Mediante pestanas escolles o que che interesa (rebobina, destacados, catálogo completo) e unha vez seleccionada unha opción podes navegar polos contidos, ver a información estendida, reproducir, etc.

hai canles que modifican a súa grella ata no mesmo día da emisión

a web de programación

A segunda alternativa interesante para consultar a programación da tele de R está en http://guiatv.mundo-R.com: alí accederás á grella de programación da televisión R e do pago por visión.

Que podo facer nesta web?:

• Consultar que se emitirá en cada canle nos vindeiros 30 días. Malia os cambios imprevistos dalgunhas cadeas, a información actualízase diariamente para que sexa o máis fiable posible, cousa que non se pode facer nunha publicación escrita (como a nosa revista), onde os contidos redáctanse con semanas de antelación.
• Crear unha grella personalizada de varias canles para consultar a programación.
• Consultar a partir da canle /día (grella vertical no canto de horizontal).
• Realizar buscas de contidos por canle, xénero, franxa horaria e incluso por texto libre (escribindo o nome dun actor, evento, etc).
• Mandar alertas de SMS ou correo electrónico para lembrarche que non perdas un programa.
• Xerar o mesmo texto que aparecía na revista dentro da pestana “revista” (por se alguén desexa imprimilo).

E a cousa non remata aquí porque xa estamos a lle dar voltas a outras ideas para que ben cedo poidas manexar a túa tele dende a web, coma se tiveses un mando virtual. Ou sexa, poderías, por exemplo, lanzar unha sesión de rebobina, acceder á información de vídeo baixo demanda ou mesmo decidir que eventos queres gravar (nun futuro gravador de vídeo persoal).